اعلانات نصية

**زمن الواقع** · الجمعة نوفمبر 14, 2014 11:40 pm

نقاش هادىء وموضوعى وحيادى .. هل التنمية البشرية .. فكر جديد ولا نصب أكيد؟

الاخوه الافاضل رواد المنتدى الكرام ..
بدون مقدمات . انا انهاردة حبيت اطرح قضية مهمه جدا للنقاش وابداء الاراء حول موضوع التنمية البشرية .

هل فعلا التنمية البشرية علم جديد وفكر حديث بنستفاد منه .. ولا هى عباره عن طرق نصب حديثه وضحك على الدقون ووكلام جميل ملفوف بورق سلويفان ومتزوق لجذب الشباب التائه والحيران وعديمى الخبره فى الحياه لتمسكهم بأى وسيله او حجه للوصول للنجاح السريع وتحقيق الثروات الطائلة من خلال كورسات كتييييره ومحاضرات بألوف الجنيهات ومن مدربين ما انزل الله بهم من سلطان لا نعلم من أين جائوا ومن اين درسوا تلك العلوم ومن اين مصادرهم .

طبعا انا بطرح القضيه للنقاش فى ظل مبدأ ( اختلاف الرأى لا يفسد للود قضيه ) وانا طبعا ليه اسبابى ودوافعى انى طرحت الموضوع ده بالذات لان العمليه اصبحت زى الموضه دلوقتى وموضوع التنمية البشرية والبرمجه اللغويه العصبية بقى منتشر جدا فى معضم البلاد العربية وبالاخص مصر .

انا فى البدايه سمعت عن الموضوع ده وكنت مهتم بيه جدا وهنا بالاخص فى قسم ركن التنمية البشرية وتطوير القدرات وكنت متحمس جدا ونزلت كتب كتيره هنا من المنتدى ومحاضرات صوتيه وفيدوهات لانى كنت بعانى من مشاكل دراسيه وكنت محتاج حاجه تساعدنى انى اعالج المشاكل دى وهيه على فكره مشاكل اغلبها موجود عند كل الشباب زى ( الكسل - الاهمال - سوء التنظيم والفوضى - عدم الثقه فى النفس - الخوف والرهبه من الدراسه والمذاكره عامه ) طبعا انا بعد ما تعمقت فى موضوع التنمية البشريه ده حسيت انى فعلا بتغير وحسيت ان الحياه بقى لونها بنبى بس مع التعمق اكتر ولما عملت نصيحه والدى غفر الله له لما قالى لازم تسمع الرد والرد المضاد عشان تقدر تحكم على اي حاجه وفعلا ابتديت احس ان الكلام متكرر وان الموضوع بقى فيه دعايه جامده اوى وكلام خرافى اشبه للمستحيل وعنواين كتب براقه اظنكم عارفين الكلام ده ابتديت فعلا احس ان فى عمليه نصب كبيره فى المجال ده ( مش معنى كده ان كل الى بيدرسوا الكلام ده نصابين ) وان الموضوع فيه حاجه غلط

على سبيل المثال لما تسمع مثلا الحاجات دى لازم لو ربنا كرمك بشويه عقل تستغرب على الاقل
يعنى انا لما بخش الفيس بوك وبتجيلى رسائل من ضمنها مثلا

1- احضر الكورس الفلانى للدكتور والمحاضر العالمى فلان ( معرفش ده اصلا دكتور في ايه ) وفى خلال 3 ساعات هرجعلك ثقتك فى نفسك ومش عارف كورس تانى هخليك تقرا 25 الف كلمه فى الدقيقه وكورس ثالث محاضره هتخليك تقنع اى حد غصب عنه وكورس رابع هوريك ازاى تحقق الثروات الطائله وكورس خامس ازاى تكتسب قلوب الناس وحبهم ليك حتى لو انته حبسجى وبياع كلام وكورس سادس وسابع وثامن إلخ ...........

وتفضل تخرج من كورس وتخش فى كورس وتقضى حياتك كلها كورسات يا عينى وألوفات الجنيهات الى عمال تصرفها فى الكورسات دى كنت ممكن تعمل بيها حاجه لنفسك احسن ما تتباهى بالشهادات وتقعد تقول انا مش عارف كنت بتدرب تحت ايد فلان وعلان وانا مش عارف بقيت مدرب معتمد من علان ودى شهاده من عند اكبر مدرب تنميه بشريه فى وسائل الاتصال وغيره وغيره وغيره من اساليب النصب والاحتيال لحد لما هنيجى فى وقت مش هنلاقى حد مابيديش كورسات فى الحاجات دى .
وطبعا باين جدا من اسلوب الدعايه والاعلان الرهيب على كل وسائل الاعلام زى الانترنت والفضائيات والاعلانات والكتب والمجلات لحد ما هوس التنمية البشرية سيطر على شريحه جامده من المجتمع واعتقد ان ده كان فعلا هدف الناس الى بتقول على نفسها علماء فى الموضوع ده

يا جماعه انا والله العظيم لا بتهم حد بالنصب ولا بقولك التنمية البشريه دى حرام بس بصراحه الموضوع اتبدى يبان على حقيقته الى كله مش عاوز يعترف بيها

ان كل ده كلام فى الهجايص وان الموضوع تجارى بحت

انا زى ماقلتلكم لما كان عندى مشاكل فى الدراسه ولقيت الموضوع ده تعمقت فيه جامد وافتكرت انى كده بحل مشاكلى كلها وكأن الموضوع ده فانوس سحرى بيحللى مشاكلى بس للاسف انا لما بتصدم فى حاجه بتنهار كلها قدامى وانا مشاكلى الدراسيه زادت اكتر من الاول وبدل ما كنت بذاكر ساعتين ولا ثلاثه بقيت بفضل التنميه البشريه مش بذاكر خالص لانى كنت كل اما اجى اذاكر اروح اقرا تنمية بشريه لما احاول اعمل اى نشاط اروح اقرا تنمية بشرية لما احب ازور ناس اروح اقرا تنمية بشرية وكذلك الحال مع الى بياخدوا كورسات فى المجال ده بقى كل حياتهم كورسات فى كورسات لاكن فى الواقع ماحدش بيطبق الكلام ده لانه فعلا لا بيودى ولا بيجيب والناس بتتصدم فى الواقع لانى زى ماقلت ده كلام حلو ولذيذ ويبان انه سهل تنفيذه ولكن الناس لما بتتعامل مع الواقع بتلاقى الموضوع مختلف تماما

دى وجه نظرى الشخصيه وانا عاوز اراءكم وردودكم وبلاش يا جماعه الردود البهتانه عاوزين نقاش حيادى وموضوع بجد

وانا فى المشاركه القادمه هنقلكم بعض اراء الكتاب والنقاد فى المجال ده

وشكرا للتواجدكم

الموضوعالأصلي : نقاش هادىء وموضوعى وحيادى .. هل التنمية البشرية .. فكر جديد ولا نصب أكيد؟ المصدر : منتديات وجدة للنجدة الكاتب:زمن الواقع