 منتـديات وجـدة للنجـدة |
| شاطر |
 الخميس نوفمبر 27, 2014 8:01 pm | المشاركة رقم: | |||||||||||||||||||||||||||||||||||
|  القياده هم, قلة ذوق, و متكلمنيش عن الأخلاق!! بسم الله الرحمن الرحيم القياده فن ذوق و أخلاق, جمله جميله فعلا كلنا تقريبا قريناها في كل حته أو سمعناها من حد قراء اليافطه دي في الشارع, و بصراحه مش عارف ليه صرف الفلوس على الفاضي في يافطه زي دي بتخاطب نفسها أولا و أخيرا. القياده فن أكيد طبعا القياده فن, بس لأي حد هي فن في ام الدنيا أنا مش عارف, فيه ناس فاهمه ان الفن في القياده هو فن الفتونه و قلة الأدب و ده برضه نوع من أنواع الفن إلي ما شاء الله كل السواقين المصريين سواء ملاكي, نقل, أجره أو حتى بسكلته إتعلمه و أصبح مدرس و بيدي خبرته لأي واحد جديد في السواقه. مثال على كده, لو أنت لسه بتتعلم سواقه جديد حتلاقي صاحبك جنبك بيقولك يا عم إزنق عليه ولا يهمك أصلك على كده حتفضل متتحركش... أدي موقف, الموقف التاني لو أنت إتزنقت في الشمال و عايز تخش الشارع و الدخله على اليمين, تلاقي صاحبك بينصحك انك تكسر على العربيه إلي جنبك و تبوز ببوز عربيتك و تزنقه و انك كده شاطر و إتعلمت مهاره جديده إسمها الغتاته على خلق الله, بس يوم ما تبوز بعربيتك و تاخد على بوزك من عربيه تانيه حتلاقي صاحبك بيقولك يا عم دي غلطته هو مش شايف بوزك ولا ايه؟ طبعا دي أمثله بسيطه جدا و بتحصل في المشوار الواحد أكتر من مره انك تلاقي حد فرحان ببوز عربيته و بيحب يزنقه قصاد عربيتك علشان ياخد مكانك و تلاقي علامات النصر على وشه قد كده. القياده ذوق ياعيني على الذوق و أنت عندك اي مشكله في العربيه و إضطررت غصب عنك تاخد يمينك و تركن و مدي إنتظار كنوع من الأدب منك علشان تعرف الذوق إلي وراك ان عندك مشكله في العربيه و مضطر تقف, حتلاقيه بكل جنتله بيشتمك و انك حمار علشان وقفت قصاده و هو طبعا وراه متش الأهلي و الزمالك عايز يلحقه و أنت بغلاستك أنت و عربيتك وقفت قصاده و بقى مضطر انه يحرك إيده على الدركسيون علشان يلف الطاره و أكيد قبل كل ده حيهدي طبعا, لا فعلا ايه الغتاته دي؟ الحكايه دي فكرتني بحوار حصل معايا من أسبوع و أنا على كوبري أكتوبر, طرمبة المياه بايظه و العربيه سخنت فمضطر طبعا أقف علشان أزود مياه, كنت على الشمال و إديت إشاره يمين و أول ما جيت على اليمين إديت إنتظار و بدأت أهدي واحده واحده علشان إلي ورايا يفهم إني حقف, إنما لاء فضل لازق في ضهر العربيه و اما وقفت إداني كلكسات و قلبلي نور, فنزلت لقيته مش راضي يسيب الكلكلس, طب أعمل ايه يعني؟ معبرتوش و فتحت الكبوت فهو بكل أدب طلع من عربيتي طلعه أمريكاني و قال كلام كده بصراحه مسمعتوش, بس أكيد كان بيمدح فيا و بيدعيلي ربنا ان العربيه تقوم بالسلامه!! القياده أخلاق بالظبط القياده أخلاق و دي أهم حاجه بيتميز بها شعب المحروسه, الأخلاق و الأدب يعني مثلا لو لا قدر الله حصل حادثه, حتلاقي أول حاجه سمعتها ايه؟ طبعا مفيش الحمد لله لاء فيه أنت يا كذا و كذا و كذا, دنا حخرب بيتك يا كذا و كذا و كذا, أنت مبتشفش و حتى لو هو غلطان برضه حيطلعك غلطان و ياسلام بقى لو عارف حد رتبه يبقى أنت إلي غلطان و ستين غلطان طبعا, و لا أنت عندك رأي تاني ولا مؤاخذه؟ طب الحوارات دي اما تحصل مع رجاله بتكون قرف, إنما بقى لما يكون إلي سايق بنت؟ هنا بتبان أخلاق شعب المحروسه بجد, فأكيد حتلاقي واحد غتت ماشي في الشارع و ميفهمش حاجه في الميكانيكه و بمجرد انه لقى واحده واقفه و عربيتها عطلانه يتحول لأسطى فاهم كل حاجه و يقولها " عايزه حاجه يا قموره؟ و تلاقيه دفس راسه جوا الكبوت من غير ما هي تلحق تقوله اي حاجه و يطلعلها بإجابه مقنعه, العربيه بايظه يا أستاذه و عايزه ميكانيكي, بس اما تروحيله قوليله يغير الأبله طين (الأبلاتين) علشان مش حلو". و تلاقيه بيتفزلك و بيحشر إيده في العربيه و لو صاحبة العربيه إعترضت و مشته بالذوق يا حيكمل معاكسه أو يشتمها. لو سواق تاكسي بقى حيحاول يطلع مصلحه بأي شكل, يا يقطر العربيه يا يديها شوية بنزين و العربيه فيها بنزين أصلا.... الميكروباص و المقطوره, عربيات حلوة و قموره طبعا سواقين الميكروباص و النقل أفعالهم المنيله بنيله معروفه للكل, و دلوقتي حتلاقي ان سواقين الميكروباص أصبحوا مثال للسواقه بالدراع فأكيد لو زنقت على حد حتسمع جمله يا إما إنك ولا مؤاخذه "حمار" أو عامل زي سواقين الميكروباص او فاكر نفسك سايق ميكروباص. حتى دلوقت سواقين الميكروباصات ليهم لغة و طريقة لبس و منظر معين, يعني لو أنت مثلا بتكلم اي بنت زميلتك في الشغل أو الجامعه و غصب عنط قلت اي كلمه في نظرها انها "بيئه" حتقولك ايه ده ايه أسلوب الميكروباصات ده؟؟!! و لو مثلا رحت جبت قميص مش ولا بد و قصيت شعرك قصه مش إلي هي حتلاقي أصحابك بيقولولك ايه يا عم ده مالك عامل زي سواقين الميكروباصات كده هع هع هع؟؟ طبعا أنا مش بتتريق على سواقين الميكروباصات بس ولا من مهنه سواقة الميكروباصات بس أنا مش مع سواقين الميكروباصات إلي بيتحرشوا بالركاب البنات أو البنات إلي ماشيه في أمان الله في الشارع سواء محجبات أو لاء, فحينوبهم نصيبهم من السفاله بتاعة سواقين الميكروباص و النقل و إنضملهم الملاكي كمان بحلم أشوف في مصر بحلم أمشي في شارع الناس كلها بتلتزم بحارتها و الشارع يكون متخطط صح مش أبقى ماشي في الحاره بتاعتي و فجأه ألاقي إني ماشي في نص حاره تانيه علشان فجأة برضه ألاقي ان التخطيط بقدرة قادر إتغير!! بحلم إني أمشي في شارع هادي و محدش بيزنق على التاني و لا ميكروباص يقف في نص الشارع و الناس تجري قدام عربيتك علشان يلحقوا يركبوا وسيلة المواصلات إلي توديهم شغلهم بطريقه غير آدميه و كل ده علشان مفيش نظام ولا في إحترام لذاتنا و لا إحترام من سائق الميكروباص إلي كأنه بيمن على الناس بعربيته الخرده انه يوصلهم شغلهم. و مازال للموضوع بقيه و حفضل أكتب عن الموضوع ده و أنشر السلبيات و أتمنى كلنا نحاول نلتزم إحتراما لذاتنا و أدميتنا و إحتراما للغير و لو كله بطل يقول منا حبقى محترم ليه و غيري مش محترم حنلاقي ان البلد حالها بقى أفضل و ان كله إلتزم إن شاء الله 
| |  | |||||||||||||||||||||||||||||||||
| الإشارات المرجعية |
| الذين يشاهدون محتوى الموضوع الآن : 20 ( الأعضاء 3 والزوار 17) |
| ||||||||||
©phpBB | انشاء منتدى مجاني | منتدى مجاني للدعم و المساعدة | التبليغ عن محتوى مخالف | آخر المواضيع